***
September 23, 2016 at 3:37 am
Ես այնքան լավ եմ յուրացրել Տեր
Քո ոճը
որ կարող եմ նոր հայտնություն կցել
գրքիդ
ու Դու գլխի չընկնես
կամ եթե ընկնես էլ
ի՛նչ կփոխվի
ջնջելո՞ւ ես ինչ է գրածս
բառ առ բառ
համբերությամբ
մորս պես
ձեռքս բռնած
ավելին` երեկ հենց
ես մի սպիտակ մազ եմ գտել
բարձիս վրա
ու Եսայու չափ վստահ եմ
որ Քո մազն է
ես չեմ ճանաչում
ուրիշ մեկին
ճերմակ մորուքով
այդքան երկար
հիմա ես կարող եմ
անսխալ
ստանալ Քո երկվորյակին
իդեալական
կամ եթե տարբերվի անգամ
թեթևակի
խախտելո՞ւ ես ինչ է
դրա համար
լռությանդ երդումը
հավերժական
հիստերիկ գոռգոռալով
երկնքով մեկ
մի թել
մազի համար
ընդամենը
հ.գ.
իսկ մեր վեճի համար
ասա՜ մարդկանց
որ Դու ես միշտ
սկզբից ինձ բզբզողը